Nisma për mbajtjen e këtij takimi erdhi pas takimit që ushtruesi i detyrës së drejtorit të Shërbimit të Trupit Koordinues, Nenad Mitroviq, zhvilloi më 6 korrik 2026 me kryetarin e Këshillit Kombëtar të Pakicës Kombëtare Shqiptare, Enkel Rexhepi. Me atë rast, kryetari i Këshillit Kombëtar paraqiti disa kërkesa, të cilat i cilësoi si me rëndësi të veçantë për pakicën kombëtare shqiptare. Me qëllim që këto çështje të shqyrtoheshin drejtpërdrejt me institucionet kompetente, ushtruesi i detyrës së drejtorit të Shërbimit të Trupit Koordinues propozoi organizimin e një takimi të përbashkët me ministrin për të Drejtat e Njeriut, të Pakicave dhe Dialogun Shoqëror, Dema Berisha. Gjatë atij diskutimi nuk u paraqit asnjë kundërshtim ndaj propozimit që takimi të organizohej me ministrin, as nuk u bë e ditur se kryetari i Këshillit Kombëtar nuk do të merrte pjesë në një takim të mundshëm të caktuar.

Duke u nisur nga kjo, Shërbimi i Trupit Koordinues, në bashkëpunim me Ministrinë për të Drejtat e Njeriut, të Pakicave dhe Dialogun Shoqëror, organizoi takimin që ishte caktuar për datën 13 korrik 2026 në Pallatin e Serbisë.

Megjithatë, Shërbimi i Trupit Koordinues mori një njoftim me shkrim nga kryetari i Këshillit Kombëtar të Pakicës Kombëtare Shqiptare, Enkel Rexhepi, se ai nuk do të merrte pjesë në takimin e caktuar.

Shërbimi i Trupit Koordinues shpreh keqardhjen që nuk u shfrytëzua mundësia që çështjet e ngritura më herët nga kryetari i Këshillit Kombëtar të shqyrtoheshin drejtpërdrejt me ministrin për të Drejtat e Njeriut, të Pakicave dhe Dialogun Shoqëror dhe që, përmes dialogut institucional, të diskutoheshin mundësitë për zgjidhjen e tyre.

Organizimi i takimeve të tilla, me pjesëmarrjen e përfaqësuesve të Qeverisë së Republikës së Serbisë dhe institucioneve kompetente, kërkon koordinim serioz dhe harmonizim të detyrimeve të të gjithë pjesëmarrësve. Pikërisht për këtë arsye është me rëndësi të madhe që këto mundësi të shfrytëzohen kur ekziston gatishmëria e organeve shtetërore për të diskutuar drejtpërdrejt çështje me rëndësi për qytetarët.

Shërbimi i Trupit Koordinues mbetet i përkushtuar fuqishëm ndaj dialogut institucional dhe do të vazhdojë, në bashkëpunim me Qeverinë e Republikës së Serbisë dhe ministritë kompetente, të ndërmarrë të gjitha aktivitetet e orientuara drejt zgjidhjes së çështjeve me rëndësi për komunat Preshevë, Bujanoc dhe Medvegjë. Shërbimi i Trupit Koordinues do të vazhdojë të jetë një partner i besueshëm në nxitjen dhe koordinimin e dialogut ndërmjet vetëqeverisjeve lokale, Këshillit Kombëtar të Pakicës Kombëtare Shqiptare dhe institucioneve shtetërore, në interes të qytetarëve dhe të forcimit të mëtejshëm të bashkëpunimit të ndërsjellë.

Burimi: Shërbimi i Trupit Koordinues