Me rastin e fillimit të vitit shkollor 2026/2027, më 1 shtator, u.d. i drejtorit të Shërbimit të Trupit Koordinues, Nenad Mitrović, së bashku me bashkëpunëtorët, vizitoi shkollat fillore në komunat Bujanoc dhe Preshevë, ku nxënësve të klasës së parë u dorëzoi çanta dhe pajisje shkollore dhe u uroi një fillim të mbarë dhe të suksesshëm të shkollimit.
Në komunën e Bujanocit, Nenad Mitrović vizitoi Shkollën Fillore „Vuk Stefanović Karaxhiq“ në Levosoje, ku, në prani të zëvendëskryetarit të Komunës së Bujanocit, Aleksandar Milošević, shpërndau çantat dhe pajisjet shkollore, ndërsa më pas vizitoi Shkollën Fillore „Desanka Maksimović“ në Bilaç. Në Bilaç, në ceremoninë e shpërndarjes morën pjesë shefja e Kabinetit të Kryetarit të Komunës së Bujanocit, Albulena Bećiri, dhe shefi i Departamentit për Shërbime Publike, Agim Hasani.

Në komunën e Preshevës, Nenad Mitrović vizitoi Shkollën Fillore „Vuk Karaxhiq“ në Stacionin Hekurudhor. Në shpërndarjen e çantave dhe pajisjeve shkollore morën pjesë përfaqësues të Komunës së Preshevës, anëtarët e Këshillit Komunal Enver Aliu dhe Bilal Bilali, shefi i Departamentit për Financa Esat Sediju, shefi i Departamentit për Veprimtari Shoqërore Mustafa Isufi dhe këshilltari në Kuvendin e Komunës së Preshevës, Branko Trajković.
Shkollën Fillore „Selami Halaçi“ në Rahovicë e vizitoi u.d. zëvendësdrejtoresha e Shërbimit të Trupit Koordinues, Jelena Čolić, e cila nxënësve të klasës së parë u dorëzoi çanta dhe pajisje shkollore. Në shpërndarje morën pjesë edhe përfaqësues të Komunës së Preshevës.

Gjatë vizitës në shkolla, Nenad Mitrović bisedoi me nxënësit, mësuesit dhe përfaqësuesit e vetëqeverisjeve lokale dhe theksoi se investimi në arsim dhe krijimi i kushteve të mira për shkollimin e fëmijëve është një nga prioritetet e rëndësishme të punës së Shërbimit të Trupit Koordinues.
„Dëshirojmë që fillimi i shkollimit për nxënësit tanë më të vegjël të jetë sa më i bukur dhe pa shqetësime. Çanta dhe pajisjet shkollore janë një shenjë e vogël vëmendjeje, por edhe një mënyrë për të treguar se kujdesemi për fëmijët dhe arsimimin e tyre. Të gjithë nxënësve të klasës së parë u uroj shumë sukses, dije, shoqërim dhe kujtime të bukura gjatë shkollimit“, tha Nenad Mitrović.
Sipas të dhënave të dorëzuara nga njësitë e vetëqeverisjes lokale, në vitin shkollor 2026/2027, në klasën e parë në komunën e Preshevës janë regjistruar 305 nxënës, ndërsa në komunën e Bujanocit janë regjistruar 356 nxënës të klasës së parë.

Për realizimin e kësaj veprimtarie, Shërbimi i Trupit Koordinues ka ndarë gjithsej 3.200.000,00 dinarë, ndërsa mjetet janë shpërndarë në përpjesëtim me numrin e nxënësve që regjistrojnë klasën e parë.
Sigurimi i çantave dhe pajisjeve shkollore është pjesë e mbështetjes së vazhdueshme të Shërbimit të Trupit Koordinues për fëmijët dhe familjet në territorin e Preshevës, Bujanocit dhe Medvegjës, me qëllim që nxënësit më të vegjël ta fillojnë arsimin fillor sa më të përgatitur dhe pa shqetësime.
Urojmë të gjithë nxënësit e klasës së parë për një fillim të mbarë dhe të suksesshëm të shkollimit, shumë dije, shoqërim dhe kujtime të bukura shkollore!

Burimi: Shërbimi i Trupit Koordinues